Жаңалықтар

(2025 жылғы 2–3 желтоқсан)
Қытай Халық Республикасына жасалған жұмыс сапарының алғашқы күнінде Басқарма төрағасы – Ректоры Д. Ахмед-Закиның бастауымен делегация Пекинде бірқатар кездесулер өткізіп, жасанды интеллект пен білім беру саласын цифрландыру бойынша алдыңғы қатарлы тәжірибелермен танысты.
Peking University өкілдері қазіргі әлемдік университеттердің стандарттарына айналған цифрлық оқыту экожүйесін көрсетті. Делегация адаптивті білім беру платформалары, жазбаша жұмыстарды интеллектуалды тексеру жүйелері, семантикалық антиплагиат және оқу тәуекелдерін болжау құралдарының жұмысы жөнінде толық ақпарат алды. Бұл технологиялар студенттердің жеке оқу траекториясын қалыптастыруға және академиялық шешімдердің сапасын арттыруға мүмкіндік береді.
Tsinghua University қабырғасында жасанды интеллект саласындағы зерттеу бағыттары таныстырылды. Делегация компьютерлік көру және NLP зертханаларының жұмысына, сондай-ақ кампустың цифрлық егізі жобасына назар аударды. Мұндай технологиялар логистиканы оңтайландыруға, оқу үдерісін басқаруға және деректер ағынын нақты уақыт режимінде реттеуге көмектеседі.
Lenovo штаб-пәтеріне жасалған сапар бағдарламаның маңызды бөлігі болды. Компания өкілдері университет инфрақұрылымын жаңғыртуға арналған индустриялық шешімдерді, AI компьютерлерін, интеллектуалды оқу кеңістіктерін, серверлік платформаларды және Edge AI құрылғыларын таныстырды. Бұл тәсілдер жоғары оқу орындарының оқу және әкімшілік ортасын тиімді жаңартуға мүмкіндік беретіні атап өтілді.
Beijing Future Center-де делегация мемлекеттік деңгейдегі цифрлық басқару жобаларымен танысты. Биометриялық сәйкестендіру жүйелері, VR және AR тренажерлері, ғимараттардың цифрлық егіздері және жасанды интеллектке негізделген құзыреттерді бағалау платформалары Қытайдың білім беру кеңістігін технологиялық тұрғыда нығайтуға бағытталған стратегиялық қадамдары ретінде ұсынылды.
Пекинге жасалған осы сапар Қытайдың жетекші университеттері мен технологиялық компаниялары білім, ғылым және басқару саласына жасанды интеллектті қалай енгізіп жатқанын жан-жақты түсінуге мүмкіндік берді. Алынған материалдар халықаралық серіктестіктерді кеңейтуге, жаңа зерттеу бағыттарын дамытуға және ОҚУ-дың цифрлық инфрақұрылымын одан әрі жаңғыртуға негіз болады.