Жаңалықтар

Ресейдің «МИФИ» Ұлттық ядролық зерттеу университеті мен И.М. Губкин атындағы Ресей мемлекеттік мұнай және газ университетінің филиалдарын құру туралы Үкімет Қаулысы қабылданды.

Биыл қазан айында аталған жоғары оқу орындары филиалдарының базасында «Қорғалған жоғары өнімді есептеу жүйелері», «Элементар бөлшектер физикасы және космофизика», «Мұнай мен газды іздеу және барлау», «Мұнай және газ кен орындарын игеру, пайдалану және кешенді механикаландыру мен автоматтандыру», «Мұнай және газ тасымалдау» сияқты мамандықтар бойынша кадрларды дайындау басталады. Оған 200 грант бөлінді. Оқу процесіне жетекші ресейлік профессорлар тартылмақ.

- Кәсіби кадрларды даярлау мен ғылыми зерттеулерді ұйымдастыруда жоғары оқу орындарын әлем елдерінің тәжірибесімен ұштастыру және ынтымақтастық ауқымын кеңейту заманауи білім беру технологияларын кеңінен енгізуге мүмкіндік береді. Техникалық кадрларды дайындау жағынан ресейлік ғылым әлемдегі ең үздіктердің бірі саналады. Сондықтан бұл тәжірибе бізге өте пайдалы, - деп есептейді ҚР Ғылым және жоғары білім министрі Саясат Нұрбек.

Елімізде Ресейлік жоғары оқу орындары кампустарының ашылуы қазақстандық жастарға елден шықпай-ақ халықаралық білім алуға мүмкіндік береді.

Естеріңізге сала кетсек, Мемлекет басшысы елімізде 2025 жылға дейін шетелдік жоғары оқу орындарының 5 жаңа филиалын ашу туралы тапсырма берген болатын. 2022 жылдың ақпан айында ҚР Білім және ғылым министрлігі мен РФ Ғылым және жоғары білім министрлігі арасында өзара ынтымақтастық туралы Меморандумға, сондай-ақ тараптар арасында Ресей Федерациясында және Қазақстанда екі елдің жоғары оқу орындарының филиалдарын ашу туралы келісімге қол қойылған.