Жаңалықтар

TEX4FUTURE: Өзбекстан мен Қазақстандағы болашақ текстиль өндірісі
ERASMUS-101128738-EDU-2023-CBHE

2025 жылғы 14 мен 21 мамыр аралығында қонақжай Измир қаласында TEX4FUTURE халықаралық жобасы аясында жоғары деңгейдегі оқу бағдарламасы өтті. Іс-шара Қазақстан мен Өзбекстан академиялық топтарын біріктіріп, текстиль саласындағы білім беру мен зерттеулер саласындағы ынтымақтастық пен тәжірибе алмасуды кеңейтуді мақсат етті.

Профессор Асиль Дейр «Текстильді өңдеу» және «Текстильдің химиялық сынақтары» тақырыптарында лекциялар оқыды. Сонымен қатар, ол арнайы сынақ жабдықтарын пайдалана отырып, текстиль материалдарының химиялық және физикалық қасиеттерін талдауға арналған зертханалық сабақтар өткізді.

Профессор Октай Памук пен Мехмет Кючюк делегацияларды басқарды және текстиль мен тігін кәсіпорындарына сапарлар ұйымдастырды. Қатысушылар өндірістік процестер мен технологиялық тәжірибелермен нақты жағдайларда танысты. Профессор Мехмет Кючюк «Киім өндірісі технологиясы» тақырыбында лекция оқып, тігін өндірісіндегі қазіргі тенденциялар мен инновацияларға ерекше тоқталды.

Бағдарламаға мәдени шаралар да енгізілді. Мәдени бағдарлама аясында қатысушылар Этнографиялық музей мен Қағаз және кітап өнері музейіне барып, жергілікті мұра мен дәстүрлі өнер түрлерімен танысты.

Қазақстандық делегация құрамына М. Әуезов атындағы Оңтүстік Қазақстан университетінен мыналар кірді:

• Текстиль және тағамдық машиналар факультетінің деканы Еркебаева С.У.
• «Текстиль материалдарын технологиясы және жобалау» кафедрасының меңгерушісі, т.ғ.д. А.А. Ешжанов
• Сол кафедраның аға оқытушысы, т.ғ.к. Г.Я. Калдыбаева
• Химиялық инженерия және биотехнология жоғары мектебінің оқытушысы А.Р. Калдыбаева