Жаңалықтар

Бірінші курс студенттері арасындағы жыл сайынғы Спартакиаданың салтанатты жабылу рәсімі өтіп, ол Аграрлық факультеттің айтулы жеңісімен аяқталды. Тартысты әрі қиян-кескі бәсекеде факультетіміздің құрама командасы жоғары спорттық дайындық, жеңіске деген жігерлілік пен командалық рух танытып, жалпыкомандалық есепте құрметті бірінші орынды иеленді!

Жарыстың барлық күндері бойы Аграрлық факультеттің бірінші курс студенттері түрлі спорттық пәндер бойынша үздік нәтижелер көрсетіп, қарсыластарын шаң қаптырды және факультет қоржынына алтын мен жүлделі марапаттарды сенімді түрде салды.

Жабылу және жеңімпаздарды марапаттау рәсіміне факультет деканы, қауымдастырылған профессор, ҚР АШҒА академигі Г.Р. Тастанбекова бастаған факультет басшылығы, профессор-оқытушылар құрамы және спортшыларды жаңа рекордтарға жігерлендірген қалың жанкүйерлер қауымы қатысты.

«Бұл жеңіс - студенттеріміздің ерен еңбегінің, тәртібі мен өз факультетіне деген адалдығының нәтижесі. Бірінші курс студенттеріміздің тек оқу мен ғылымда ғана емес, спортта да айрықша нәтижелер көрсетіп жүргенін мақтан тұтамыз. Сіздер — біздің болашағымыз бен мақтанышымызсыздар!» - деп атап өтті факультет деканы Г.Р. Тастанбекова чемпиондарды құттықтай отырып.

Аграрлық факультет барлық бірінші курс спортшыларын, жаттықтырушылар мен белсенділерді осы жарқын жеңісімен шын жүректен құттықтайды! Қол жеткізген табыстармен тоқтап қалмай, жаңа өмірлік, академиялық және спорттық шыңдарды бағындыруды тілейміз! Спартакиада кубогы бізде!