"Көлік, тасымалдауды және қозғалысты ұйымдастыру" кафедрасы

«Көлік, тасымалдауды және қозғалысты ұйымдастыру» кафедрасының

ТАРИХЫ

  «Көлік, тасымалдауды және қозғалысты ұйымдастыру» кафедрасы Қазақстан Республикасының оңтүстік аймағының көлік саласында жоғары білімнің қалыптасуы мен дамуына үлес қосқан бітіруші кафедра болып табылады.

1994 жылы кафедра құрылған күннен бастап кафедраны Мәскеу автомобиль-жол институтының түлегі – т.ғ.к., доцент Туленов Айдарали Туленович  басқарды. 2007 жылы «Автомобиль көлігі» кафедрасының атауы «Көлік және тасымалдауды ұйымдастыру» кафедрасы, ал 2010 жылы «Көлік, тасымалдауды және қозғалысты ұйымдастыру» кафедрасы болып өзгертілді. 2013 жылдан бастап қазіргі уақытқа дейін кафедраны т.ғ.к., доцент Үсіпбаев Үсен Асылбекұлы басқарып отыр, ол 2018 жылы «Жылдың үздік оқытушысы» атағына ие болды.

Қазіргі уақытта кафедра бес білім беру бағдарламасы бойынша бакалаврларды даярлауды, атап айтсақ 6В07130 – Көлік, көліктік техника және технологиялар, 6В07131 – Автосервис және фирмалық қызмет көрсету, 6В11310 – Көлікті пайдалану,  жүк  қозғалысы  мен  тасымалдауды ұйымдастыру, 6В11311 – Темір жол көлігінде тасымалдауды ұйымдастыру, 6В11312 – Көлік логистикасы және 7М07130 – Көлік, көлік техникасы және технологиялары және 7М07133 – Көлік логистикасы білім беру бағдарламалары бойынша магистрлерді даярлауды жүзеге асырады. 6В07130 – Көлік, көліктік техника және технологиялар білім беру бағдарламасы «Т-BUS» ЖШС-мен бірлесіп дуальды білім беру жүйесіне әзірленді. 

Білім беру бағдарламаларын 13 техника ғылымдарының кандидаты, 1 педагогика ғылымдарының докторы, 3 профессор, 9 доцент, 4 магистр, 6 жұмыс беруші іске асырып жатыр. Кафедра оқытушылары арасында «Жоғары оқу орнының үздік оқытушысы» атағының иегерлері: Ажибеков К.Ж. – п.ғ.д., доцент (2014ж.), Пернебеков С.С. – т.ғ.к., профессор  (2017ж.), Туленов А.Т.-т.ғ.к., профессор  (2019ж.), Тортбаева Д.Р. – т.ғ.к., доцент (2020ж.).   Пернебеков С.С. ғылым мен білім беруді дамытуға қосқан үлесі үшін Тәуелсіз Мемлекеттер Достастығының «Үздік ғылыми қызметкері-2023» төсбелгісімен марапатталды.

Университет пен жетекші кәсіпорындар арасындағы білім беру саласындағы ынтымақтастықты дамыту және байланыстарды нығайту мақсатында кафедра 2009 жылы «Қазақстан темір жолы» ҰК АҚ «Қазығұрт» станциясының базасында ОҒӨК құрды, онда студенттер өндірісте еңбекті ұйымдастырудың озық әдістерімен танысады және кәсіби тәжірибе мен дағдыларға ие болады.

Кафедра ұзақ уақыт бойы ғылым және білім беру саласында жақын және алыс шетелдердің жоғары оқу орындарымен, атап айтқанда Логистика және көлік академиясымен (Алматы), Л.Н. Гумилев атындағы Еуразия Ұлттық Университетімен (Астана), Александр I императорының Петербург мемлекеттік қатынас жолдары университетімен (РФ), Орал мемлекеттік қатынас жолдары университетімен (РФ), Қиыр Шығыс Мемлекеттік қатынас жолдары университетімен (РФ), Мәскеу автомобиль-жол мемлекеттік техникалық университетімен (РФ), Ташкент автомобиль-жол институтымен (Өзбекстан), Ташкент көлік инженерлері институтымен (Өзбекстан), Дрезден техникалық университетімен (Германия), Мадрид политехникалық университетімен (Испания), Катовице экономика университетімен (Польша), Вильнюс мемлекеттік университетімен (Литва) және т. б. тығыз байланыста.

Кафедраның ғылыми-зерттеу қызметі пайдаланудағы машиналардың сенімділігін басқару әдістерін зерттеуге және жетілдіруге, тасымалдау тиімділігі мен қозғалыс қауіпсіздігін арттыру бойынша зерттеулерге, көлік техникасының экологиялық қауіпсіздігін арттыруға бағытталған. Кафедра ұжымы ғылыми мақалалар түрінде мыңнан астам ғылыми-әдістемелік еңбектерін ҚР журналдарында, ККСОН, Scopus, Thomson Reuters, Elsevier импакт-факторы нөлге тең емес және РИНЦ журналдарында, сондай-ақ халықаралық конференциялар жинақтарында мемлекеттік, орыс және ағылшын тілдерінде жариялады, авторлық куәліктер, патенттер, монографиялар, оқу құралдары, электронды оқулықтар бар. Жыл сайын ғылыми-зерттеу жұмыстарының нәтижелері өндіріс пен оқу үдерістеріне енгізіледі. Оқытушылардың жетекшілігімен студенттер мен магистранттар факультет, университет деңгейіндегі конференцияларға, республикалық және халықаралық ғылыми-техникалық конференцияларға белсенді қатысады, халықаралық студенттік олимпиадалардың жеңімпаздары болып табылады, І, II дәрежелі дипломдары бар, жүлделі орындарға ие болады.

Академиялық ұтқырлық бағдарламасы аясында біршама студенттер Люблин техникалық университетінде (Польша), Брно қаласындағы техникалық университетте (Чехия), Гедеминас атындағы Вильнюс техникалық университетінде (Литва), Эсслинген қаласында қолданбалы ғылымдар университетінде (Германия), Хемницк технологиялық университетінде (Германия), Стамбул Мәдениет университетінде (Түркия) оқып келді.

2018 жылдан бастап темір жол және жоғары жылдамдықты магистральдарды салу және пайдалану саласында мамандар даярлау мақсатында кафедра ERASMUS+ бағдарламасы шеңберінде «Экономика, экология және жоғары жылдамдықты темір жол инфрақұрылымы» (EEIHSR) халықаралық жобасына қатысады. Жобаның мақсаты – Economic, Ecology and Infrastruktur at High-Speed Railway (EEIHSR) атты магистрлік білім беру бағдарламасын әзірлеу. Бұл жобаның үйлестіруші университеті Дрезден техникалық университеті (Германия) болып табылады.
Кафедра түлектері кең бейінді мамандар болып табылады және көліктің барлық салаларында сұранысқа ие.